Måndag neste veke møtest EU sine energiministrar i Luxembourg. Ministrane vil diskutere «REPowerEU»-vegkartet for utfasing av russisk energi, som EU-kommisjonen la fram 6. mai. På dagsordenen står òg diskusjonar om styrking av energiunionen og forsyningstryggleiken, trygging av kritisk infrastruktur, metanforordninga og EU-landa sine nasjonale energi- og klimaplanar. Danmark vil orientere om sitt kommande formannskap i Rådet (andre halvår av 2025).
Illustrasjonsbilete frå Unsplash
Forslag til nye sanksjonar
EU-kommisjonen la tysdag fram forslag til ei 18. pakke med sanksjonar mot Russland. Sanksjonane retter seg mot energisektoren og banksektoren. Blant tiltaka er forbod mot transaksjonar knytt til gassrøyrleidningane Nord Stream 1 og Nord Stream 2, senking av oljepristaket frå 60 dollar til 45 dollar fatet, og listeføring av ytterlegare fartøy som er del av den såkalla skyggeflåten.
Global konferanse om energieffektivisering
I dag og i morgon (12.–13. juni) arrangerast ein global konferanse om energieffektivisering i Brussel, i regi av Det internasjonale energibyrået og EU-kommisjonen. Energikommissær Dan Jørgensen heldt ei opningstale og understreka betydinga av energieffektivisering for klimaet, energiprisar og energitryggleik.
Europeisk veke for berekraftig energi
Denne veka fann konferansen «European Sustainable Energy Week» stad i Brussel, i regi av EU-kommisjonen. Det er mogleg å sjå dei ulike arrangementa i opptak (krev innlogging).
