EU-kommisjonen publiserte tysdag ei delegert rettsakt som fastset metoden for å definere lågkarbon-hydrogen og -brensel. Hydrogen produsert frå ikkje-fornybare kjelder vil kunne reknast som lågkarbon dersom utsleppa er minst 70 prosent lågare samanlikna med bruk av fossil energi. Kommisjonen peikar på naturgass kombinert med karbonfangst og -lagring, og elektrolyse basert på lågkarbon-elektrisitet, som døme på produksjonsmetodar for lågkarbon-hydrogen. Metoden i den delegerte rettsakta tek omsyn til utslepp i heile livssyklusen, både ved produksjon og bruk. Europaparlamentet og Rådet har no to månadar på seg til å vurdere den delegerte rettsakta, og kan enten godkjenne eller forkaste ho.
Illustrasjonsbilete: lagringsenter for hydrogen i Belgia (Foto: Claudio Centonze, EU)
Godkjende gasslagerforordninga
Europaparlamentet gav tysdag si formelle godkjenning til gasslagerforordninga, etter at Parlamentet og Rådet kom til semje om saka i juni. Når Rådet òg har gitt si formelle godkjenning, vil forordninga bli publisert i EU-tidende.
Kvartalsrapportar om gass og straum
Førre veke publiserte EU-kommisjonen rapportar om gass- og straummarknadene for første kvartal i år. Straumrapporten viser mellom anna at produksjon av solenergi auka med 30 prosent samanlikna med same periode i fjor. Gassrapporten peikar mellom anna på at importen av røyrgass frå Russland har falle med 45 prosent sidan førre kvartal, og at USA no er nest største gassleverandør til EU, etter Noreg.
Vedtok rapport om energitryggleik
Europaparlamentet vedtok onsdag ein rapport om energitryggleik og motstandsdyktigheit. Rapporten legg særleg vekt på behovet for å styrkje vern av kritisk infrastruktur, og å sikre brei diversifisering av både energikjelder og energiimport.
