Statsministeren deltok på opninga av Yara sitt nye karbonfangstanlegg i Nederland
Statsminister Jonas Gahr Støre deltok 7. september på opninga av Yara sitt nye karbonfangstanlegg i Sluiskil i Nederland, saman med Nederland sin statsminister Rob Jetten og EUs klimakommissær Wopke Hoekstra. Anlegget fullfører verdas første grensekryssande verdikjede for karbonfangst og -lagring. Les meir på regjeringa.no. Sjå òg pressemeldingar frå EU-kommisjonen og Yara.
I samband med besøket underteikna statsminister Støre og statsminister Jetten ei felles fråsegn som etablerer eit strategisk partnarskap mellom Noreg og Nederland. Partnarskapen omfattar mellom anna samarbeid på energiområdet. Les meir på regjeringa.no.
Opninga av Yara sitt karbonfangstanlegg i Sluiskil, Nederland, 7. september (Foto: Guillaume Cortade, EU 2026)
Energikomiteen vedtok posisjon om energiinfrastruktur
Energikomiteen i Europaparlamentet (ITRE) vedtok i dag Parlamentet sin posisjon til forslaget om revisjon av forordninga om transeuropeisk energiinfrastruktur (TEN-E). Tsvetelina Penkova, som har hatt ansvar for saka i Parlamentet, sa at Europa treng rett infrastruktur på rett stad, basert på solid kunnskap om behova til innbyggjarar og næringsliv. Komiteen røysta òg for å starte trilogforhandlingar med Rådet om saka. Dersom Parlamentet godkjenner dette i plenum, kan trilogforhandlingane starte.
Ny ACER-direktør
Christof Lessenich blir ny direktør for EU sitt energibyrå ACER, går det fram av ei pressemelding 10. september. Lessenich kjem frå EU-kommisjonen sitt generaldirektorat for energi (DG ENER), der han sidan 2021 har leia arbeidet med den indre energimarknaden. Utnemninga gjeld for fem år, med høve til forlenging i ytterlegare fem år. Lessenich stilte torsdag til utspørjing i energikomiteen i Europaparlamentet (sjå opptak her).
Ikkje uroa for oljeforsyninga i EU
Oljekoordineringsgruppa ser ingen umiddelbare teikn til utfordringar for oljeforsyninga i EU. Gruppa hadde møte tysdag 8. september, med deltaking frå EU-kommisjonen, EU-landa, Det internasjonale energibyrået (IEA), NATO og representantar frå oljeindustrien. Samstundes peikte gruppa på at situasjonen i Midtausten framleis er ustabil, og at geopolitisk uvisse gir store prissvingingar på råolje og oljeprodukt. Dette gjeld særleg prisane på flydrivstoff og diesel.
