La fram «Clean Industrial Deal» og handlingsplan for rimeleg energi
Onsdag la EU-kommisjonen fram meldinga «Clean Industrial Deal», eit vegkart for auka europeisk konkurranseevne og framskunda satsing på avkarbonisering. Meldinga har eit særleg fokus på energiintensiv industri og reine teknologiar. Kommisjonen viser til at europeisk industri har behov for akutt støtte i møte med urettvis og hard global konkurranse. «Clean Industrial Deal» inneheld derfor fleire tiltak, mellom anna for å auke tilgangen til rimeleg energi, styrke ordningar for finansiering og for å auke etterspurnaden etter «reine produkt» som vert produsert i EU. Kommisjonen la òg fram forslag til forenkling av regelverk for å lette byrda av regulering for bedrifter.
EU-kommisjonen la samstundes fram ein handlingsplan for rimeleg energi («Action Plan on Affordable Energy»). Handlingsplanen inkluderer tiltak for å redusere energiprisane, fullføre energiunionen, tiltrekke investeringar og gjere Europa betre førebudd på nye energikriser. Akselerert utbygging av rein energi og infrastruktur, meir elektrifisering og betre overvaking av gassmarknadene er òg blant tiltaka.
«Clean Industrial Deal» blei presentert av EU-kommisjonen sin visepresident Ribera, visepresident Séjourné og klimakommissær Hoekstra. Foto: Nicolas Landemard, EU 2025
Handlingsplan for vern av undersjøiske kablar
EU-kommisjonen presenterte førre veke ein handlingsplan for auka vern av undersjøiske kablar, i felleskap med høgrepresentanten for EU sin utanriks- og tryggleikspolitikk. Handlingsplanen har fokus på straumkablar og kommunikasjonskablar. Nokre av tiltaka vil kunne utvidast til å gjelde annan kritisk infrastruktur, slik som røyrleidningar og havvindparkar, skriv Kommisjonen. Tiltaka i handlingsplanen er innordna under mål om betre førebygging, oppdaging, respons og reparasjon, og avskrekking.
Ny støtte til Ukraina sin energisektor
Måndag presenterte EU-kommisjonen ei ny pakke med støtte til Ukraina på energiområdet. Pakka skal bidra med trygging av energisystemet og leggje til rette for full integrasjon Ukraina og Moldova sine straummarknader med EU innan våren 2027. Det vert òg lagt opp til vidare integrasjon av gassektoren, og støtte til finansiering av gasskjøp og fornybar energi.
Vedtok nye sanksjonar
Måndag vedtok Rådet den 16. pakka med sanksjonar mot Russland. Blant tiltaka er forbod mot import av aluminium, eksport av programvare knytt til olje- og gassutvinning, og ei utviding av sanksjonane mot den russiske «skyggeflåten».
