Energiministeren møtte EU sin energikommissær i Brussel
Energiminister Terje Aasland besøkte Brussel fredag 21. november for den årlege energidialogen med EU. Tema for møtet mellom energiministeren og EU sin energikommissær Dan Jørgensen var energitryggleik, EU si utfasing av import av energi frå Russland, elektrisitetsmarknaden, utviklinga i karbonfangst og -lagring, og status på EØS-etterslepet på energiområdet. Same dag deltok Jørgensen og Aasland på den sjuande energikonferansen mellom EU og Noreg (sjå opptak). Les meir på regjeringa.no.
Energiminister Terje Aasland og energikommissær Dan Jørgensen (Foto: Christophe Licoppe, EU)
Europaparlamentet med tilråding om Arktis
Europaparlamentet vedtok onsdag ein resolusjon om Arktis. Parlamentet peikar på behovet for ei oppdatering av EU sin strategi for Arktis i lys av den geopolitiske situasjonen. Det blir oppmoda til å styrkje tryggleiksperspektivet og sikre ei solid forankring i folkeretten. Noreg si rolle for EU sin energitryggleik og geopolitiske motstandskraft blir framheva som avgjerande.
Kraftsystemet godt rusta for vinteren
Europa sitt kraftsystem er godt rusta for vinteren. Det bekreftar det europeiske nettverket for transmisjonssystemoperatørar for elektrisitet (ENTSO-E) i rapporten «Winter Outlook 2025-2026» som vart publisert førre veke.
EU-konferanse om karbonfangst og -lagring
EU-kommisjonen har kunngjort at det neste «Industrial Carbon Managament Forum» skal haldast i Aten 8.–9. desember. Det blir mogleg å følgje arrangementet digitalt.
