Onsdag 3. desember vart Rådet og Europaparlamentet samde om lovforslaget om utfasing av all gassimport frå Russland (kjent som «REPowerEU»). Som hovudregel skal import av flytande naturgass (LNG) fasast ut innan 31. desember 2026, medan røyrgass skal fasast ut innan 30. september 2027. Unntaksvis gjeld nokre alternative fristar (sjå nærare detaljar i pressemeldinga). Lovteksta inneber under alle omstende utfasing av all gassimport frå Russland innan november 2027. Medlemslanda pliktar å levere nasjonale planar for diversifisering av gassimport og oljeimport innan 1. mars 2026. EU-kommisjonen sin president, Ursula von der Leyen, uttala at EU no går inn i ei tid med full uavhengnad frå russisk energi. Neste steg er formell godkjenning i Europaparlamentet og i Rådet før lovteksta blir publisert i EU-tidende («Official Journal»).
EU-kommisjonen sin president, Ursula von der Leyen, heldt ei pressekonferanse saman med direktøren i Det internasjonale energibyrået, Fatih Birol, og energikommissær Dan Jørgensen (foto: Dati Bendo, EU)
Publiserte liste over grensekryssande energiprosjekt
Måndag publiserte EU-kommisjonen den andre lista over prosjekt av felles interesse (PCI) og gjensidig interesse (PMI) under infrastrukturforordninga. Lista inkluderer 235 grensekryssande energiprosjekt, mellom anna innan straumnett (113), hydrogen (100), CO2-transport (17) og smarte gassnett (3). Nokre av CO2-prosjekta er knytte til Noreg og norske aktørar. Dei utvalde prosjekta vil vere kvalifiserte til å søke om EU-finansiering og dra nytte av raskare sakshandsaming.
5,2 milliardar euro frå Innovasjonsfondet
I dag kunngjorde EU-kommisjonen tre nye utlysingar under Innovasjonsfondet, med eit samla budsjett på 5,2 milliardar euro. Den generelle utlysinga for nullutsleppsteknologiar har eit budsjett på 2,9 milliardar euro. I tillegg opna den tredje auksjonen under EU sin hydrogenbank med 1,3 milliardar euro, medan den første auksjonen for avkarbonisering av industriell prosessvarme er på 1 milliard euro.
EU-kommisjonen sine energileveransar: status etter eitt år
EU-kommisjonen har lagt fram ei oversikt over sine viktigaste leveransar på energiområdet i det første året av kommisjonsperioden.
