EU-kommisjonen la onsdag fram eit nytt lovforslag med namnet «Industrial Accelator Act». Kommisjonen ønskjer å styrkje konkurranseevna til europeisk industri, akselerere avkarboniseringa og auke etterspurnaden etter lågkarbonprodukt som vert produserte i Europa. Forslaget er særleg retta mot energiintensive industriar (stål, sement, aluminium og kjemikaliar), nullutsleppsteknologiar og bilindustrien. Lovforslaget er no sendt til Rådet og EU-parlamentet for vidare handsaming.
«Industial Accelerator Act» vart presentert av industrikommissær Stéphane Séjourné onsdag 4. mars (Foto: Claudio Centonze)
EU drøfta forsyningstryggleiken
Onsdag 4. mars vart det halde ad hoc-møte mellom EU-kommisjonen og EU-landa om forsyningstryggleiken for olje og gass i lys av situasjonen i Midtausten (i «Gas Coordination Group» og «Oil Coordination Group»). Kommisjonen uttala at det på det tidspunktet ikkje låg føre umiddelbare risikoar for forsyningstryggleiken.
EUs energikommissær i Aserbajdsjan
Energikommissær Dan Jørgensen besøkte måndag 2. mars Baku for å styrkje energipartnarskapet mellom EU og Aserbajdsjan. Han møtte mellom andre energiminister Parviz Shahbazov for samtalar om energitryggleik og energiomstilling. Kommisjonen peikar på at Aserbajdsjan er viktig for EU sitt arbeid med å diversifisere energiforsyningane.
Formell godkjenning av 2040-mål
Rådet gav i dag formell godkjenning til endringa av EU si klimalov, med eit klimamål for 2040 om 90 prosent reduksjon i klimagassutslepp, samanlikna med nivåa i 1990. Lova vil tre i kraft 20 dagar etter publisering i «Official Journal».
