EU-kommisjonen sin president, Ursula von der Leyen, kunngjorde laurdag 25. oktober at Kommisjonen arbeider med ein ny plan kalla «RESourceEU». Målet er å sikre stabil tilgang til kritiske råmateriale for europeisk industri, og samstundes redusere avhengnaden av Kina. Planen vil ha fokus på sirkulær økonomi, felles innkjøp, lageroppbygging og partnarskap med fleire land. Von der Leyen sa at «RESourceEU» er inspirert av «REPowerEU»-planen på energifeltet. Ho viste til krevjande erfaringar frå energikrisa, og sa at Europa må styrke sjølvstendet òg når det gjeld kritiske råmateriale.
EU-kommisjonen sin president, Ursula von der Leyen, heldt ein tale under konferansen «Berlin Global Dialogue» 25. oktober. Foto: Dati Bendo, EU
G7-ministermøte om energi og miljø
Denne veka finn det årlege G7-ministermøtet om energi og miljø stad i Toronto, Canada (30.–31. oktober). Frå EU-kommisjonen deltek energikommissær Dan Jørgensen og miljøkommissær Jessika Roswall. På dagsordenen står kritiske råmateriale, rolla til kunstig intelligens i energiomstillinga, kjernekraft og energitryggleik. Energitryggleiken i Ukraina vil òg bli drøfta, i tillegg til globale miljø- og klimaspørsmål.
Dan Jørgensen i Romania og Bulgaria
Energikommissær Dan Jørgensen har denne veka vore i Romania og delteke på eit ministermøte for energisamarbeidet i Sentral- og Søraust-Europa («High-Level Group on Central and South-Eastern Europe Energy Connectivity»). Utfasing av russisk gass og tiltak for lågare energiprisar var blant hovudtemaa for møtet. Jørgensen besøkte òg Bulgaria for å sjå bygginga av det regionale gassinfrastrukturprosjektet «Vertical Gas Corridor».
ACER om utviklinga i gassmarknadene
EU sitt energibyrå, ACER, har denne veka publisert to rapportar om gass. Den eine rapporten, frå 27. oktober, handlar om utviklinga i engrosmarknadene for gass frå juli til september i år. Den andre rapporten, frå 30. oktober, tek for seg utviklinga i gassmarknadene frå 2021 og fram til midten av 2025.
Energiprisane i første halvår av 2025
Eurostat publiserte denne veka statistikk om straumprisane og gassprisane for hushaldingar i første halvår av 2025.
