Måndag neste veke møtest EU sine energiministrar i Brussel. EU-kommisjonen er invitert for å presentere handlingsplanen for rimeleg energi («Action plan for affordable energy»), som vart lagt fram 26. februar. Ministrane vil òg diskutere energitryggleik, vinterberedskap og kritisk infrastruktur. Den ukrainske energiministeren vil orientere om energisituasjonen i Ukraina. Direktøren for EU sitt energibyrå (ACER) vil informere om utviklinga i straum- og gassmarknadene.
Illastrasjonsbilete frå Pixabay
Energidebattar i Europaparlamentet
Denne veka har det vore plenumsmøte i Europaparlamentet i Strasbourg. Parlamentarikarane har mellom anna diskutert EU-kommisjonen sin plan «Clean Industrial Deal» (les transkribering). Energi- og bustadkommissær Dan Jørgensen deltok i debattar om utfasing av russisk energi (les innlegg) og om EU-kommisjonen sin handlingsplan for rimeleg energi (les innlegg).
«Clean Industrial Deal» tema for rådsmøte
Diskusjon om «Clean Industrial Deal» og «Competitiveness Compass» sto øvst på dagsordenen då Rådet for konkurranseevne møttest onsdag. I ei pressemelding skriv Rådet at ministrane støttar fleire av tiltaka som er føreslått av EU-kommisjonen, mellom anna diversifisering av energiforsyningar og investeringar i straumnett og i infrastruktur for energilagring.
61 bod i hydrogenauksjon
I den andre auksjonsrunden under EU sin hydrogenbank har det komme bod frå 61 prosjekt i 11 land i EØS. Prosjekta vil bli evaluerte innan slutten av mai. Auksjonsrunden har eit budsjett på 1,2 milliardar euro.
