EU-kommisjonen presenterte tysdag fleire nye framlegg på energifeltet: ein strategi for investeringar i rein energi («Clean Energy Investment Strategy»), ei energipakke for innbyggjarar («Citizens Energy Package»), ein strategi for små og modulære kjernereaktorar («Strategy for Small Modular Reactors») og ei melding om investeringsbehov i kjernekraft («Nuclear Illustrative Programme»). I tillegg publiserte Kommisjonen ei pakke knytt til finansiering av energieffektivisering. Framlegga blei presenterte av energikommissær Dan Jørgensen og visepresident Teresa Ribera under vekas plenumssesjon i Europaparlamentet i Strasbourg. Ifølgje Jørgensen vil initiativa bidra til styrkt konkurranseevne, redusert energiavhengnad og lågare energiprisar for innbyggjarane i EU.
Energikommissær Dan Jørgensen og visepresident Teresa Ribera i pressekonferanse tysdag (Foto: Roméo Boetzle, EU)
Energiministermøte neste veke
Måndag 16. mars møtest EU sine energiministrar i Brussel. På dagsordenen står drøftingar om den europeiske nettpakka («European Grids Package»), som EU-kommisjonen la fram i desember. Det blir òg diskusjon om handlingsplanen for rimeleg energi («Action Plan for Affordable Energy»). Energitryggleik blir teke opp, og energiministrane frå Ukraina og Moldova vil dele sine erfaringar. I tillegg blir det samtalar om investeringar i rein energi, saman med ACER sin fungerande direktør, Volker Zuleger, og Laura Piovesan frå leiinga i Den europeiske investeringsbanken.
Von der Leyen deltok på toppmøte om kjernekraft
EU-kommisjonen sin president Ursula von der Leyen deltok tysdag på eit toppmøte om kjernekraft i Paris, arrangert av den franske regjeringa («World Nuclear Energy Summit»). Von der Leyen sa i tala si at satsing på kjernekraft, saman med fornybar energi, vil bidra til å styrkje forsyningstryggleiken og konkurranseevna i Europa. Ho peikte på at interessa for kjernekraft aukar internasjonalt, og at EU ønskjer å ta del i denne utviklinga.
