La fram lovforslag for utfasing av gass og olje frå Russland
Tysdag 17. juni la EU-kommisjonen fram eit forslag til forordning om gradvis utfasing av import av russisk gass og olje. Lovforslaget er ei oppfølging av «REPowerEU»-vegkartet som Kommisjonen la fram 6. mai. Forslaget til forordning inneber forbod mot gassimport (både røyrgass og flytande naturgass) med gitte fristar, i tillegg til sporing og overvaking av gassimport. Vidare skal medlemslanda legge fram planar for utfasing av både gass- og oljeimport frå Russland. Forhandlingar om lovforslaget vil no starte opp i Rådet og i Europaparlamentet.
Energi- og bustadkommissær Dan Jørgensen presenterte lovforslaget i Europaparlamentet 17. juni (foto: EU, 2025)
Energiministrane møttest i Luxembourg
Måndag møttest EU sine energiministrar i Luxembourg. Blant hovudtemaa under møtet var vegkartet for utfasing av russisk energi («REPowerEU»). Det polske rådsformannskapet vedtok konklusjonar om styrking av energiunionen og av energitryggleiken, med støtte frå 25 av medlemslanda. På dagsordenen stod òg mellom anna diskusjonar om kjernekraft, metanforordninga, sertifisering og import av biobrensel, og Danmark sine prioriteringar på energifeltet under deira kommande formannskap i Rådet. EU-kommisjonen orienterte om behovet for investeringar i kjernekraftsektoren («Nuclear Illustrative Programme, PINC»).
Danmark med prioriteringar for formannskapet
I dag presenterte Danmark programmet og prioriteringane for formannskapet deira i Rådet (1. juli til 31. desember). På energiområdet vil formannskapet arbeide for å fremme forsyningstryggleik, konkurranseevne og grøn omstilling. Sikring av rein og rimeleg energi og utfasing av energiimport frå Russland vert framheva som sentrale prioriteringar.
Energisaker i Europaparlamentet
«Clean Industrial Deal» og straumnett har denne veka vore oppe til diskusjon under Europaparlamentet sitt plenumsmøte i Strasbourg. Parlamentet vedtok i dag ein rapport om straumnett og oppmodar mellom anna til styrking av straumnetta i Europa og til betre koordinering mellom medlemslanda. Parlamentet vedtok òg ein resolusjon om «Clean Industrial Deal» og tek til orde for tettare samanknyting av industriell konkurranseevne og klimatiltak.
Etablerer arbeidsgruppe for energiunionen
Denne veka har EU-kommisjonen og det polske rådsformannskapet lansert ei ny arbeidsgruppe, «Energy Union Task Force». Etableringa av arbeidsgruppa blei først varsla i handlingsplanen for rimeleg energi, som blei lagt fram av Kommisjonen i februar. Med representantar frå både EU-kommisjonen og frå medlemslanda, vil gruppa mellom anna arbeide for betre samarbeid og koordinering på energiområdet, og for optimalisering av bruken av energiinfrastruktur.
