Måndag 15. desember møttest EU sine energiministrar i Brussel. Øvst på dagsordenen stod ein diskusjon om «Connecting Europe Facility», eit program for finansiering av grensekryssande energiinfrastruktur, under EU sitt neste langtidsbudsjett (2028–2034). Ministrane kom til semje om sentrale delar av regelverket.
Ministrane diskuterte òg straumnettpakka «European Grids Package», som blei lagt fram av Kommisjonen førre veke, og forordninga om reduksjon av metanutslepp i energisektoren (sjå eiga pressemelding).
Under møtet deltok NATOs visegeneralsekretær Radmila Šekerinska i ei utveksling om samspelet mellom energi og tryggingspolitikk. Kypros orienterte om sitt kommande formannskap i Rådet. Direktøren i Det internasjonale energibyrået, Fatih Birol, var invitert til ei drøfting av europeisk forsyningstryggleik og konkurranseevne i eit globalt perspektiv.
Danmark sin klima-, energi- og forsyningsminister Lars Aagaard heldt ei pressekonferanse etter energiministermøtet 15. desember. Danmark har formannskapet i Rådet dette halvåret. (foto: European Union)
La fram europeisk straumnettpakke
EU-kommisjonen la 10. desember fram ei regelverkspakke knytt til straumnettet («European grids package»). Pakka skal bidra til ei meir samordna europeisk tilnærming i planlegging av infrastruktur, akselerere godkjenningsprosedyrar og sikre ei meir rettvis fordeling av kostnader til grensekryssande prosjekt. Kommisjonen framhevar at investeringar i nettet kan gi vesentlege innsparingar på systemnivå. Pakka inkluderer to rettsakter (revidering av infrastrukturforordninga og forslag til direktiv om godkjenningsprosedyrar), som vil bli behandla i Rådet og i Europaparlamentet. Kommisjonen la òg fram initiativet «Energy Highways», som skal adressere åtte prioriterte flaskehalsar i energiinfrastrukturen.
Godkjende semje om utfasing av russisk gass
Onsdag gav Europaparlamentet formell godkjenning til semja mellom Europaparlamentet og Rådet om lovforslaget for utfasing av gassimport frå Russland (kjent som «REPowerEU»). Neste steg er formell godkjenning i Rådet, før lovteksta blir publisert i EU-tidende.
Høyring om styringssystemforordninga
I dag opna EU-kommisjonen ei høyring om styringssystemforordninga («Governance regulation») i samband med eit kommande forslag til revidering av forordninga, som er venta i fjerde kvartal 2026. Fristen for innspel er 12. mars 2026.
